• तिलक कोइराला ।

सानिमा माई हाईड्रोको संस्थापक सेयर साधारणमा रुपान्तरण भएर दोस्रो बजारम किनबेच हुने अवधि पुरा गरेपछि सेयर बजारमा आपुर्ति ह्वात्तै बढेको छ ।

दुई अर्ब १० करोड चुक्ता पूँजी रहेको सानिमा माईले हालै बिक्री गरेको शत प्रतिशत हकप्रद समेत साधारण सेयर सरह दोस्रो बजारमा बिक्रीमा आएपछि त्यस कम्पनीको सेयर मूल्य तीब्र रुपमा ओरालो लागेको हो । बुधबार मात्रै उसको दुई लाख ९० हजार भन्दा बढी कित्ता सेयर किनबेच भयो । त्यसभन्दा अघिल्लो दिन एक लाख २५ हजार कित्ता सेयर किनबेच भएको थियो । बजारमा सेयर आपुर्ति बढेसँगै मूल्य पनि तीब्र रुपमा घटेको छ ।

सानिमा माई हाईड्रोको सेयर रजिष्ट्रार सानिमा क्यापिटलका एक बरिष्ठ अधिकारीका अनुसार संस्थापक सेयर साधारणमा बदलिएर दोस्रो बजारमा किनबेच भईसकेको छ भने हालै बिक्री गरिएको एक करोड पाँच लाख कित्ता हकप्रद सेयर पनि लगानीकर्ताको हितग्राही खातामा जम्मा भईसकेको छ । सेयर धितो कर्जा लिएर सेयर रोक्का रहेका बाहेक सबैको हितग्राही खातामा क्यापिटलले सेयर जम्मा गरिदिएको छ । कतिपय संस्थापक सेयरधनीले पनि आफ्नो नाममा आएका ठूला कित्ता हकप्रद सेयर दोस्रो बजारमा साधारण सरह बेचिसकेका छन् ।

लक्ष्मी बैंकसहित नौ वटा बैंकहरुले आयोजनामा बित्तीय लगानी गर्दा ब्यक्तिगत ग्यारेन्टी स्वरुप रोक्का राखिएको सेयर भने दोस्रो बजारमा आएको छैन तर उनीहरुले किनेको हकप्रद भने सम्बन्धित सेयरधनीको हितग्राही खातामा पुगेर बेचबिखन भईसकेको सानिमा क्यापिटल स्रोतले बताएको छ ।

यसबारेमा कुरा गर्न सानिमा क्यापिटलका प्रमुख कार्यकारी मनिषमान जोशीलाई सम्पर्क गर्न खोज्दा सम्पर्क हुन सकेन ।

सानिमा माई हाईड्र्रोको चुक्ता पूँजी हाल दुई अर्ब १० करोड रहेकोमा त्यसको हालको बजार मूल्य प्रति कित्ता ४१८ को दरले हिसाब गर्दा आठ अर्ब ७७ करोड रुपैयाँ भन्दा बढी हुन आउँछ । दुई करोड १० लाख कित्ता सेयरहरु एकैपटक बजारमा किनबेचमा आएमा माग र आपुर्तिको सन्तुलन बिग्रन भई महंगोमा सेयर किनेकाहरुले धाम्नै नसक्ने घाटा सहनुपर्ने अबस्था आउँछ । कम्पनीको संचालकहरुले धारणा गरेको सेयर सर्बसाधारणमा सेयर जारी गरेको आठ बर्षसम्म दोस्रो बजारमा बिक्री गर्न नपाईने हुँदा सबै सेयर बिक्रीमा आउँदैन तर हालै हकप्रद वापत कम्पनीले बिक्री गरेको सेयर मात्रै बजारमा किनबेच भए पनि अहिलेको बजारको अधिक आपुर्तिमा झन् चाप पर्ने अबस्था छ ।

जलबिद्युत आयोजनाहरुले सर्बसाधारणमा सेयर जारी गरेको तीन बर्ष पुगेपछि सबै संस्थापक सेयर साधारण सरह दोस्रो बजारमा बेच्न सकिने ब्यवस्था छ ।

गैरआवासीय नेपालीहरुको मुख्य लगानी रहेको सानिमा हाईंड्रोले ईलाममा दुईवटा आयोजनाबाट गरी २९ मेगावाट विजुली उत्पादन गरिरहेको छ भने देशका अन्य भागमा ठूला आयोजनाहरु निर्माणको चरणमा छन् ।

कम्पनीले चालु आर्थिक बर्षको पहिलो त्रैमाससम्ममा २८ करोड खुद नाफा कमाएर प्रतिसेयर आम्दानी १४ रुपैयाँ २१ पैसा कायम गरेको छ । यो शतप्रतिशत हकप्रद सुचिकृत हुनुभन्दा अघिको हिसाब हो । शत प्रतिशत हकप्रद बिक्री हुनुभन्दा अघि उसको सेयर मूल्य प्रतिकित्ता १२३९ रुपैयाँसम्म पुगेको थियो ।

हकप्रदको बहानामा उचालिएर सेयर किन्दा सेयर बजारमा आईपर्ने जोखिम ब्यहोर्न चर्को मूल्य चुकाउनुपर्ने हुन्छ भन्ने कुरा सानिमा माईबाट पाठ सिक्नुपर्छ । कम्पनी राम्रो भएकाले प्राथमिक सेयर अर्थात आईपीओमा सेयर पारेर दीर्घकालीन लगानी गर्नेलाई भने कुनै जोखिम छैन ।

गत बर्षको खुद नाफाबाट सानिमा माईले कुनै लाभांश बाँडेन, आउने बर्ष भने लगानीकर्ताले केही प्रतिफल पाउलान् भन्ने आशा गर्न सकिन्छ ।

2 COMMENTS

  1. कम्पनी को सन्चालक ले धारण गरेको शेयर र प्रोमटर शेयर मा के फरक छ सर ?

    • कम्पनी संस्थापना हुँदा संचालकहरुले धारण गरी ऋण लिँदा ब्यक्तिगत ग्यारेन्टी दिएका सेयर भन्नाले संचालकले धारण गरेको सेयर भन्ने बुझिन्छ । अरु संस्थापक र स्थानीयबासीलाई बिक्री गरिएको सेयर पनि जलबिद्युत कम्पनीले साधारण सेयर सर्बसाधारणमा बिक्री गरेको तीन बर्ष नभई दोस्रो बजारमा बिक्री गर्न पाईन्न ।

LEAVE A REPLY

Please enter your comment!
Please enter your name here